七月廿三日　星期三

有堅野自然有泰國最出名既．．．流波衫啦。按圖索驥，走到成條都係賣假波衫既街， 真係成行成巿，不過質素就真係無 EBAY o個o的假衫咁見得人啦，好極都只不過係旺角 女人街質素，當然你話價錢就當然呢到平得多，我同占爺都估可能女人街都係向到入貨 潻．．．

相影得唔多，怕比人打丫麻。反而有間鋪頭幾過癮，一邊擺明賣假衫，一邊個價錢標到 鬼死咁貴好似堅野咁，咁出奇當然望清楚啦。結果真真假假兩邊都係流，當然個價錢標 到鬼死咁貴o個邊既質素係好好多，要細心睇先分得出係流野啦。

大球場去錯旺角場

利記既操練安排向黃昏六點舉行，結果我就犯左個大錯。簡單黎講，我地五點半去到球 場，先發現去錯球場，再簡單咁講本應去大球場結果去錯旺角場。今鋪死啦，人生路不 熟，幾經辛苦問到 BTS 空鐵職員點去，再轉的士。去過曼谷都知曼谷最出名係咩o架啦 ，咪就係塞車！結果幾經辛苦六點九先去到球場，占爺仲黑晒面，鬼咩．．．呢單野前因後果我要負上好大責任。

點都好，操練就唔欺場，操足個半鐘到七點半先散場，咁我地都仲叫有得睇返九個字。散場時成隊波仲排晒隊同你整返個「沙嘩DEE卡」手勢。呢招真係一招通行，班波黎到香港都仲係咁用。

龍門操練咪走寶

基本上要操練既野同香港操既一模一樣，但就發現一樣野，注意力去晒奧雲到，無咩人 留意龍門口操練。結果呢樣野一返到香港就大派用場！o向香港操練時，我同朋友走晒去 龍門操練o個一邊，杜迪克同卻克蘭見少人就同我地輪流影相簽名，真係發晒大達。

泰國利迷既熱情，香港比起上o黎都係輸零比九。好多人冇操練門票入場照向門口逼，逼 到班球員沖完涼上巴士打道回府時仲堆晒o向到，我都唔知o架巴士點先可以返酒店。

唔大牌點叫球星？

你唔好理，我雖然上的士仲早過班球員較腳，但架球員巴士仲早過我地成粒鐘返到酒店 （可能有人開路卦）。當我去到酒店時班球員已經食完晚飯返上房間咁濟，基本上大多 球員都係當o的球迷無到，某o的大班球星態度差到無人有，費事提邊個影響到佢向你心 目中形象啦。球員一個一個咁食完上房，等電梯時班實Ｑ係咁搵佢地合照，搞到班泰國利迷幾咁激動，有無爆粗我就唔識聽啦。

喂，有衰人當然有好人，今日既大好人就係卻克蘭；食完飯既佢赤腳著住對拖鞋，得佢 一個人特登走過o黎利迷呢一邊影相合照，搞到個場面立即起哄瘋狂。欲罷不能，就咁應 酬左我地成三、四個字。o拿，呢o的球員好心有好報既。

晚上十點，收工，係時候去曼谷周圍搵野醫肚。等聽日睇波。

待續

按圖放大